Juan y Junior foi un dúo musical formado polo recoñecido artista galego Juan Pardo (que xa conta neste recompilatorio cunha versión do seu Xuntos feita pola Familia Caamagno) e Antonio Morales “Junior”. Estiveron en activo entre os anos 1967 e 1969 e a súa discografía foi intensa, pero breve (tan só seis sinxelos publicados).
Ademais de converterse nun clásico pop, Anduriña conta cunha historia verdadeiramente curiosa no relativo á súa contraportada. O xornalista galego Antonio D. Olano levoulle unha copia da canción ao mesmísimo Pablo Picasso. Tanto lle gustou ao pintor malagueño que lle fixo un debuxo espontáneo como recordo. A pesar de que os dous artistas quixeron que a obra fose directamente a portada do seu sinxelo, á súa discográfica pareceulle que non era o suficientemente comercial.
Nesta ocasión, o grupo pontevedrés La Casa de los ingleses dálle unha dose de ritmos bailables a un dos temas máis míticos da música galega. Unha sorte de pop de guitarras que respecta de xeito fidedigno a melodía orixinal pero cunha intensidade que recorda a bandas anglosaxonas como Teenage Fanclub ou Foutains of Wayne.
Esta é a nova achega a Puro Deleite, o proxecto que culminará coa edición dun disco completo. Súmase así a unha lista que xa conforman a Munheira de Chantada de Verto, Por última vez dos Ataque Escampe, Xuntos da Familia Caamagno, O Tren de Ale, Miña terra galega de Radio Océano e Quen poidera namorala de Paloma.
O tema foi gravado nos Estudios Mans, na Coruña. Está producido por Juan Hernández, de Ronettstudio. O grupo La Casa de los ingleses fórmano Anxo (guitarra e voz), Carlos (batería), Charly (baixo e voces) e Xavi (guitarra e voces).